Մարիամգյուլի կերպարի կատարողական բարձրակետը մայրական անկեղծ զգացմունքների պոռթկումով, կերպարի խորապես հավաստի անձնավորումն է: Իսկ ներկայացման ավարտին, երբ հնչում է Արցախի օրհներգը, Մարիամգյուլ-Ասրյանի հոգին տակնուվրա է լինում` կերպարում հառնում է ազգային հպարտությունը, արտիստուհու աչքերից հոսում է կարոտի և հաղթանակի արցունքները:
Երբ Հ.Պարոնյանի անվան թատրոնը որոշեց բեմադրել Գ.Ֆիգերեյդոյի "Աղվեսն ու խաղողը" (կամ "Եզովպոս") հերոսական կատակերգությունը, Քլեայի ըստ ամենայնի դժվար դերը վստահվեց շնորհաշատ դերասանուհի Ժասմեն Ասրյանին:
Արտիստուհին Քլեային պատկերեց աստիճանական զարգացման մեջ, բացահայտելով նրա հոգու տառապանքները: Ժասմենը Քլեայի կերպարը մարմնավորեց հոգեբանական խոր վերլուծության ճանապարհով՝ նբորեն մշակելով հերոսուհու բնավորության բարդ անցումները:
Քլեան խռովահույզ և տանջալից սիրով սիրահարվում է Եզովպոսին` հելեն հպարտ գեղեցկուհին ծնկի է գալիս ամենաայլանդակ ստրուկի առջև: Հանուն Եզովպոսի, Քլեա-Ասրյանը պատրաստ է հրաժարվել Քսանթոսի հարստությունից և դիրքից:
Ժասմենը Քլեային մարմնավորում է դրամատիկ-հոգեբանական դրությունների նուրբ կատարմամբ: Քլեային արարելիս, արտիստուհու կատարողական ձիրքը փայլեց այնպիսի կողմերով, որ նախկին աշխատանքներում նկատելի չէին: Սա այն դեպքն է, երբ դերն ու դերասանուհին ներդաշնակ են:
Քլեան եղավ Ժասմեն Ասրյանի ստեղծագործական տարիների կուտակած փորձի գեղեցիկ հանրագումարը: Ասրյանի ստեղծագործական կենսագրությանը գումարվեց ոչ միայն բարձրարվեստ կատարում, այլև արձանագրվեց որպես կատարողական նոր մակարդակ:
Պարոնյանցիների "Աղվեսն ու խաղողը" ներկայացումն ունեցավ անսովոր շատ թատերախոսականներ` բոլորն էլ միաձայն դրվատանքի ջերմ խոսքեր գրեցին Ասրյանի Քլեայի կատարողական բարձր մակարդակի մասին:

Արտիստուհու այս դերակատարումը՝ գույների առատությամբ, կատարողական նրբագեղությամբ, խոսքի և պլաստիկայի հաճելի համադրությամբ, արվեստին բնորոշ ջերմությամբ, թատերական արվեստի մնայուն հաղթանակներից է:
... Երբ Ժասմեն Ասրյանին տեսնում եմ բեմում կամ կյանքում, հիշում եմ Անտոն Չեխովի հանրահայտ խոսքը. "Մարդու մեջ ամեն ինչ պետք է գեղեցիկ լինի": Ժասմեն Ասրյանը գեղեցիկ է ամեն բանով. և՜ երևութապես, և՜ էությամբ, և՜ արվեստով:
Մաղթենք տաղանդավոր արտիստուհուն ստեղծագործական նորանոր փայլատակումներ:

Հայկազ Երանոսյան